ಬೀಜೋಪಚಾರ ಎಂದರೆ, ಬೀಜಕ್ಕೆ ಮಾಡುವ ಉಪಚಾರ. ಕನ್ನಡದ ಗಾದೆ: ‘ಬೀಜದಂತೆ ಬೆಳೆ’. ಮುಂಗಾರು ಹಂಗಾಮಿನಲ್ಲಿ ಕೈಗೊಳ್ಳುವ ಬಿತ್ತನೆ ಕಾರ್ಯಕ್ಕೆ ಮುಖ್ಯವಾಗಿ ಕೃಷಿಯಲ್ಲಿ ಒತ್ತು ನೀಡಬೇಕಾಗಿರುವ ಕಚ್ಚಾ ವಸ್ತು/ಪರಿಕರ ಎಂದರೆ ಅದು ಬೀಜ. ಅದಕ್ಕೆ ಮಾಡುವ ಉಪಚಾರ ಬಹಳ ಮುಖ್ಯ ಈ ಮೂಲಕ ಬೀಜ ಮತ್ತು ಸಸಿಯ ಸಂರಕ್ಷಣೆ ಮಾಡುವುದು ಅಥವಾ ಅದಕ್ಕೆ ಅಧಿಕ ಪೋಷಕಾಂಶ ಒದಗಿಸುವ ಕ್ರಿಯೆ.

ಹುಟ್ಟಿದ ಕೂಸಿನಿಂದ ಹಿಡಿದು ಸುಮಾರು 10 ವರ್ಷಗಳು ಆಗುವವರೆಗೂ ನಾವು ಕೆಲವೊಂದು ಚುಚ್ಚುಮದ್ದನ್ನು ಕೊಡಿಸುತ್ತೇವೆ. ಕಾರಣ,
ಮುಂದೆ ಯಾವುದೇ ರೋಗ-ರುಜಿನಗಳಿಂದ ಮುಕ್ತವಾಗಿರಲಿ ಅಂತ ಪೋಲಿಯೋ, ದಡಾರ, ಹೆಪಟೈಟಿಸಿ-ಬಿ ಹಾಗೂ ಇನ್ನಿತರ ರೋಗಗಳಿಂದ
ಮಕ್ಕಳನ್ನು ರಕ್ಷಣೆ ಮಾಡಲು ನಾವು ಚುಚ್ಚುಮದ್ದನ್ನು ಮೊದಲೇ ಕೊಡಿಸುತ್ತೇವೆ. ಅದೇ ರೀತಿ,ಬೀಜೋಪಚಾರ ಮಾಡುವುದರಿಂದ ಸಸ್ಯಗಳಲ್ಲಿ
ಪ್ರತಿರೋಧಕ ಶಕ್ತಿ ಉತ್ಪನ್ನವಾಗಲು ಪ್ರೇರೇಪಿಸುವುದು. ಇದರಿಂದ ಕೀಟ ಮತ್ತು ರೋಗಗಳ ಸಮಸ್ಯೆ ಕಡಿಮೆ ಆಗುವುದು.

ಇದರಿಂದ ರಾಸಾಯನಿಕ ಸಿಂಪರಣೆಗೆ ತಗಯಲುವ ಖರ್ಚನ್ನು ಕೂಡ ಗಮನಾರ್ಹವಾಗಿ ಕಡಿಮೆಗೊಳಿಸುವುದು. ಕೆಲವು ಜೀವಾಣುಗಳಲ್ಲಿ ಸುತ್ತಲಿನ ಪರಿಸರದಲ್ಲಿರುವ ಪೋಷಕಾಂಶವನ್ನು ಹಿಡಿದು ಗಿಡಗಳಿಗೆ ಒದಗಿಸುವ ಗುಣವಿರುವುದು. ಇಂತಹ ಜೀವಾಣುಗಳನ್ನು ಬೀಜೋಪಚಾರಕ್ಕೆ ಬಳಸಿದರೆ ಹೆಚ್ಚುವರಿ ಪೋಷಕಾಂಶಗಳನ್ನು ಗಿಡಗಳಿಗೆ ಒದಗಿಸುವುದರ ಜೊತೆಗೆ ರಾಸಾಯನಿಕ ಗೊಬ್ಬರದ ಬಳಕೆ ಪ್ರಮಾಣವನ್ನು ಕಡಿತಗೊಳಿಸಬಹುದು.

ಬೀಜೋಪಚಾರ ಮಾಡದೇ ಹೋದರೆ?

ಬೀಜದಿಂದ ಹರಡುವ ರೋಗದ ಜೀವಾಣುಗಳು ಬಿತ್ತನೆ ಬೀಜಗಳ ಗುಣಮಟ್ಟವನ್ನು ಹಾಗೂ ಇಳುವರಿಯನ್ನು 'ಕಡಿಮೆ ಮಾಡುತ್ತವೆ.
ಅಲ್ಲದೆ ಮೊಳಕೆ ಶಕ್ತಿ ಹಾಗೂ ಬೀಜ ಬಲ ಸತ್ವವನ್ನು ಕಳೆದುಕೊಳ್ಳುತ್ತವೆ. ಬೀಜವನ್ನು ರೋಗಯುಕ್ತ ಬೀಜದಿಂದ ಬೆಳೆದ ಬೇಳೆ ಕಾಳುಗಳು
ಕ್ಷೀಣಗೊಂಡು, ಮಂದವಾದ ಬಣ್ಣ ಹೊಂದಿ, ಮಾರುಕಟ್ಟೆಯಲ್ಲಿ ಅದರ ಬೆಲೆ ಕಡಿಮೆಯಾಗುತ್ತದೆ. ಬೀಜಗಳ ಗಾತ್ರ, ತೂಕ ಹಾಗೂ ಸಾಂದ್ರತೆ
ಕಡಿಮೆಯಾಗುತ್ತದೆ. ಇದರಿಂದಾಗಿ ಸದೃಢ ಹಾಗೂ ಆರೋಗ್ಯಕರ ಸಸಿಗಳನ್ನು ಬೆಳೆಯಲಾಗುವುದಿಲ್ಲ.

ಬೀಜೋಪಚಾರದ ವಿಧಾನಗಳು –

ಬೀಜೋಪಚಾರವನ್ನು ಮಣ್ಣಿನ ಮಡಿಕೆ ಅಥವಾ ಪ್ಲಾಸ್ಟಿಕ್ ಚೀಲ ಅಥವಾ ಪಾತ್ರೆಯಲ್ಲಿ ಬಹಳ ಸರಳ ರೂಪದಲ್ಲಿ ಮಾಡಬಹುದು.

ನಾಲ್ಕರಿಂದ ಐದು ವಿಧಾನಗಳಲ್ಲಿ ಬೀಜೋಪಚಾರವನ್ನು ಮಾಡಬಹುದು

1. ಮೊದಲನೆಯದಾಗಿ ಬೀಜವನ್ನು ಪ್ಲಾಸ್ಟಿಕ್ ಟಬ್ ಅಥವಾ ಪಾತ್ರೆಯಲ್ಲಿ ತೆಗೆದುಕೊಂಡು ಪೋಷಕಾಂಶವನ್ನು ತಕ್ಕ ಪ್ರಮಾಣದಲ್ಲಿ ಬೀಜದ ಮೇಲೆ ಉದುರಿಸಿ. ನಂತರ ಸ್ವಲ್ಪ ನೀರನ್ನು ಚಿಮುಕಿಸಿ, ಮಿಶ್ರಣ ಮಾಡಿ, ನೆರಳಲ್ಲಿ ಒಣಗಿಸಿ ಬಿತ್ತನೆ ಮಾಡುವುದು.

2. ಎರಡನೆಯದಾಗಿ, ಬೀಜವನ್ನು ಪ್ಲಾಸ್ಟಿಕ್ ಚೀಲದಲ್ಲಿ ತೆಗೆದುಕೊಂಡು ಅದಕ್ಕೆ ಪೋಷಕಾಂಶ ಹಾಕಿ, ನೀರನ್ನು ಚಿಮುಕಿಸಿ, ಬ್ಯಾಗನ್ನು ಬಲೂನಿನಂತೆ ಊದಿ ಬ್ಯಾಗಿನ ಬಾಯಿಯನ್ನು ರಬ್ಬರ್ ಬ್ಯಾಂಡಿನಿಂದ ಗಟ್ಟಿಯಾಗಿ ಕಟ್ಟುವುದು. ನಂತರ ಅದನ್ನು ಮೆಲ್ಲನೆ ವೃತ್ತಾಕಾರದಲ್ಲಿ ತಿರುಗಿಸಿ ಮಿಶ್ರಣ ಮಾಡಿ, ಬ್ಯಾಗಿಂದ ತೆಗೆದು ನೆರಳಲ್ಲಿ ಒಣಗಿಸಿ ಬಿತ್ತನೆ ಮಾಡುವುದು – ಬೀಜದ ಸೀಡ್ ಕೋಟ್ (ಹೊರಗಿನ ಪದರಕ್ಕೆ) ಯಾವುದೇ ಹಾನಿಯಾಗುವುದಿಲ್ಲ. ಉದಾ: ಶೇಂಗಾ

3. ಮೂರನೆಯದಾಗಿ, ಪೋಷಕಾಂಶ ಪೂರೈಸುವ ಜೀವಾಣುಗಳನ್ನು ಬೀಜಕ್ಕೆ ಅಂಟಿನ ಸಹಾಯದಿಂದಲೇ ಲೇಪನ ಮಾಡುವುದು. ಮೊದಲಿಗೆ ಬೆಲ್ಲ ಅಥವಾ ಸಕ್ಕರೆ ಪಾಕವನ್ನು ತೆಳುವಾಗಿ ತಯಾರಿಸಿ. ತಣ್ಣಗಾದ ನಂತರ ಪೋಷಕಾಂಶದ ಪುಡಿ ಬೆರೆಸುವುದು, ಅದರಲ್ಲಿ ಬೀಜ ಮಿಶ್ರಣ ಮಾಡಿ, ನೆರಳಲ್ಲಿ ಒಣಗಿಸಿ ಬಿತ್ತನೆ ಮಾಡುವುದು. ‘ಯಾವುದೇ ಪದಾರ್ಥದ ಉಪಚಾರ ಮಾಡುವಾಗ ಅದರ ಸಮನಾದ ಲೇಪನ ಪ್ರತಿಯೊಂದು ಬೀಜಕ್ಕೂ ಆಗಬೇಕು.

4. ನಾಲ್ಕನೆಯದಾಗಿ, ಗೆಡ್ಡೆಗಳು/ಸಸಿಗಳ ಬೇರುಗಳನ್ನು ಅದ್ದುವುದಾದರೆ: ಟ್ರೈಕೋಡರ್ಮಾ/ಯಾವುದಾದರೂ ಕೀಟನಾಶಕವನ್ನು ಪ್ರತಿ ಲೀಟರ್ ನೀರಿನಲ್ಲಿ ಬೆರೆಸಿ ಸಸಿಗಳನ್ನು/ಆಲೂಗೆಡ್ಡೆ ಬೀಜಗಳನ್ನು/ಕಬ್ಬಿನ ತುಂಡುಗಳನ್ನು ಅದ್ದಿ ನಾಡಿ ಮಾಡಬೇಕು.

5. ದ್ರವರೂಪ ಅಥವಾ ಅಂತರವ್ಯಾಪಿ ರಾಸಾಯನಿಕ ಬಳಸಿದಾಗ ಬೀಜೋಪಚಾರದ ನಂತರ ನೆರಳಲ್ಲಿ ಒಣಗಿಸಬೇಕು.

6. ಇದೇ ತತ್ವ ಬಳಸಿ ಮಿಶ್ರಣ ಯಂತ್ರ ಅಥವಾ ಡ್ರಮ್ ಸೀಡರ್ ಉಪಯೋಗಿಸಿ, ಅದಕ್ಕೆ ನಾವು ಸೂಕ್ತ ಪ್ರಮಾಣದ ಕೀಟನಾಶಕವನ್ನು ಬಳಸಿ, ಹೆಚ್ಚಿನ ಪ್ರಮಾಣದಲ್ಲಿ ಬೀಜೋಪಚಾರ ಮಾಡಬಹುದು.

ಬಿತ್ತನೆಗಾಗಿ ಬೀಜವನ್ನು ಸಂಗ್ರಹಿಸಿದಾಗ ಕಾಡುವ ಪ್ರಮುಖ ರೋಗಗಳು

ಭತ್ತದಲ್ಲಿ ಬೆಂಕಿ ರೋಗ, ಜೋಳದಲ್ಲಿ ಬೂಜುರೋಗ/ಕೇದಿಗೆ ರೋಗ, ಸಜ್ಜೆಯಲ್ಲಿ ಬೂಜುರೋಗ, ತೊಗರಿಯಲ್ಲಿ ಸಿಡಿರೋಗ/ಸೊರಗು ರೋಗ, ಶೇಂಗಾದಲ್ಲಿ ಕೊಳೆ ರೋಗ, ಸೋಯಾಅವರೆಯಲ್ಲಿ ಬುಡಕೊಳೆರೋಗ, ಸೂರ್ಯಕಾಂತಿಯಲ್ಲಿ ಎಲೆಮಚ್ಚೆ ರೋಗ, ಕಲ್ಲಿದ್ದಲು ಕೊಳೆ ರೋಗ, ಮೆಣಸಿಕಾಯಿಯಲ್ಲಿ ಅಂಗಮಾರಿ ರೋಗಗಳು.

ಬೀಜೋಪಚಾರದ ವಿಧಗಳು

1. ಜೈವಿಕ ಬೀಜೋಪಚಾರ
2. ರಾಸಾಯನಿಕ ಬೀಜೋಪಚಾರ
3. ಸಾಂಪ್ರದಾಯಿಕ ಬೀಜೋಪಚಾರಗಳು

1. ಜೈವಿಕ ಬೀಜೋಪಚಾರ

ಸಜೀವ ಸೂಕ್ಷಾಣುಜೀವಿಗಳನ್ನು ಬಳಸಿ ರೋಗಾಣುಗಳನ್ನು ಹತೋಟಿ ಮಾಡಲು ಸಾಧ್ಯ.
ಉದಾ: ರೈಜೋಬಿಯಂ ಜೀವಾಣು, ಟ್ರೈಕೋಡರ್ಮಾ, ಸೂಡೋಮೊನಾಸ್ ಆರಿಯಾಫ್ಯಾಸಿಯನ್ಸ್ ಮುಂತಾದವುಗಳಿಂದ ಬೀಜೋಪಚಾರ ಮಾಡುವುದರಿಂದ ರೋಗಾಣುಗಳನ್ನು ನಿಗ್ರಹಗೊಂಡು ಬೀಜ ಮೊಳಕೆ ಸುಲಲಿತಗೊಳ್ಳುವುದು.

ರೈಜೋಬಿಯಂ ಜೀವಾಣುವಿಂದ ಉಪಚಾರ:
ಉಪಚಾರ ಮಾಡುವ ವಿಧಾನ: ಮೊದಲು 100ಗ್ರಾಂ ಬೆಲ್ಲ ಅಥವಾ ಸಕ್ಕರೆ ಪಾಕವನ್ನು ತಯಾರಿಸಬೇಕು. ಅದು ಆರಿದ ನಂತರ, ಅದಕ್ಕೆ 200 ಗ್ರಾಂ ರೈಜೋಬಿಯಂ ಅಣುಜೀವಿ ಗೊಬ್ಬರವನ್ನು ಸೇರಿಸಿ. ನಂತರ ಒಂದು ಎಕರೆಗೆ ಬೇಕಾಗುವಷ್ಟು ಬೀಜವನ್ನು ದಾವಣಕ್ಕೆ ಹಾಕಿ ಕೈಯಿಂದ ಮಿಕ್ಸ್ ಮಾಡಿ ಲೇಪನ ಮಾಡಬೇಕು. N ಇದರಿಂದ ರೈಜೋಬಿಯಂ ಜೀವಾಣು ವಾತಾವರಣದಲ್ಲಿ ಇರುವ ಸಾರಜನಕ ಹೀರಿಕೊಂಡು ಬೆಳೆಗೆ ಒದಗಿಸುವುದಲ್ಲದೆ ಹಾಗೂ ಬೇರಿನಲ್ಲಿ ಸಾರಜನಕ ಹೀರುವ ಗಂಟುಗಳ ಸಂಖ್ಯೆ ಹೆಚ್ಚಾಗಿ (ನೈಟ್ರೋಜನ್ ಪ್ಯಾಕ್ಟರಿ) ಇಳುವರಿಯನ್ನು ಹೆಚ್ಚಿಸುತ್ತದೆ. ದ್ವಿದಳ ಧಾನ್ಯಗಳಾದ ಹೆಸರು, ಉದ್ದು, ಅಲಸಂದಿ, ಕಡಲೆ, ಸೋಯಾಅವರೆ, ತೊಗರಿ ಮತ್ತು ಶೇಂಗಾ ಬೆಳೆಗಳಿಗೆ ರೈಜೋಬಿಯಂ ಅಣುಜೀವಿ ಗೊಬ್ಬರದಿಂದ ಉಪಚರಿಸಬಹುದು.

ರಂಜಕ ಕರಗಿಸುವ ಜೀವಾಣುವಿಂದ (ಪಿ.ಎಸ್.ಬಿ.) ಉಪಚಾರ ಮಾಡುವ ವಿಧಾನ: ಮೊದಲು 100ಗ್ರಾಂ ಬೆಲ್ಲ ಅಥವಾ ಸಕ್ಕರೆ ಪಾಕವನ್ನು ತಯಾರಿಸಬೇಕು. ಅದು ಆರಿದ ನಂತರ, ಅದಕ್ಕೆ 200 ಗ್ರಾಂ ರಂಜಕ ಕರಗಿಸುವ ಜೀವಾಣು ಗೊಬ್ಬರವನ್ನು ಸೇರಿಸಿ. ನಂತರ ಒಂದು ಎಕರೆಗೆ ಬೇಕಾಗುವಷ್ಟು ಬೀಜಕ್ಕೆ ಕೈಯಿಂದ ಮಿಕ್ಸ್ ಮಾಡಿ ಲೇಪನ ಮಾಡಬೇಕು. ಇದರಿಂದ ಭೂಮಿಯಲ್ಲಿರುವ ರಂಜಕವನ್ನು ಕರಗಿಸಿ, ಬೆಳೆಗಳಿಗೆ ರಂಜಕವನ್ನು ಸೂಕ್ತ ರೀತಿಯಲ್ಲಿ ಸಿಗುವಂತೆ ಮಾಡುತ್ತವೆ.

ಟ್ರೈಕೋಡರ್ಮಾ ಜೀವಾಣುವಿಂದ ಉಪಚಾರ –
ಟ್ರೈಕೋಡರ್ಮಾ ಇದೊಂದು ಶಿಲೀಂಧ್ರನಾಶಕ ಶಕ್ತಿ ಇರುವ ಜೀವಾಣು ಉಪಚರಿಸುವ ವಿಧಾನ: ಯಾವುದೇ ಬೆಳೆಗೆ ಪ್ರತಿ ಕಿ.ಗ್ರಾಂ ಬೀಜಕ್ಕೆ 4-6 ಗ್ರಾಂ ಟ್ರೈಕೋಡರ್ಮಾ ಜೈವಿಕ ಶಿಲೀಂದ್ರನಾಶಕದಿಂದ ಉಪಚರಿಸುವುದರಿಂದ ತೊಗರಿಯಲ್ಲಿ ಕಂಡುಬರುವ ನೆಟಿ ರೋಗ/ಸೊರಗು ರೋಗ ಹಾಗೂ ಬೇರು ಕೊಳೆ ರೋಗಗಳನ್ನು ನಿಯಂತ್ರಿಸಬಹುದು. ಹತ್ತಿಯಲ್ಲಿ ಟ್ರೈಕೋಡರ್ಮಾ ಎಂಬ ಜೈವಿಕ ಶಿಲೀಂಧ್ರನಾಶಕವನ್ನು ಪ್ರತಿ ಕಿ.ಗ್ರಾಂ ಬೀಜಕ್ಕೆ 4 ಗ್ರಾಂ. ನಂತೆ ಉಪಚರಿಸುವುದರಿಂದ ಸೊರಗು ರೋಗ ಮತ್ತು ಬೇರು ಕೊಳೆ ರೋಗಗಳನ್ನು ನಿಯಂತ್ರಿಸಬಹುದು.

ಸಸಿಗಳ ಬೇರುಗಳನ್ನು ಆದ್ಭುವುದಾದರೆ: 10ಗ್ರಾಂ ಟ್ರೈಕೋಡರ್ಮಾವನ್ನು ಪ್ರತಿ ಲೀಟರ್ ನೀರಿನಲ್ಲಿ ಬೆರೆಸಿ ಸಸಿಗಳನ್ನು/ಆಲೂಗೆಡ್ಡೆ ಬೀಜಗಳನ್ನು/ಕಬ್ಬಿನ ತುಂಡುಗಳನ್ನು ಅದ್ದಿ ನಾಟಿ ಮಾಡಬೇಕು.

ಸೂಡೋಮೊನಾಸ್ ಜೀವಾಣು –
ಸೂಡೋಮೊನಾಸ್ ದುಂಡಾಣು ಬೇರುಗಳ ಸಮೀಪದಲ್ಲಿ ಬೆಳೆದು ಬೇರಿನ ಸುತ್ತಲೂ ಅತ್ಯಂತ ಪ್ರಬಲ ಕವಚನ್ನು ನಿರ್ಮಿಸಿ ಹಾನಿಕಾರಕ ಶಿಲೀಂಧ್ರಗಳಿಂದ ಬೇರನ್ನು ರಕ್ಷಿಸುವ ಸಾಮರ್ಥ್ಯ ಹೊಂದಿದೆ.

ಉಪಯೋಗಿಸುವ ವಿಧಾನ –
ಪ್ರತಿ ಕಿ.ಲೋ. ಬೀಜಕ್ಕೆ 4-6 ಗ್ರಾಂ ನಂತೆ ಬೀಜೋಪಚಾರ ಮಾಡಬೇಕು. ಸಸಿಗಳ ಬೇರುಗಳನ್ನು ಅದ್ದುವುದಾದರೆ: 10ಗ್ರಾಂ ಪ್ರತಿ ಲೀಟರ್ ನೀರಿನಲ್ಲಿ ಬೆರೆಸಿ ಸಸಿಗಳನ್ನು 30 ನಿಮಿಷ ಅದ್ದಿ ನಾಟಿ ಮಾಡಬೇಕು.
ಟೈಕೋಡರ್ಮ ಮತ್ತು ಸೂಡೋಮೊನಾಸ್ ಭೂಮಿಗೆ ಹಾಕುವ ವಿಧಾನ:

ಬೀಜೋಪಚಾರ ಮಾಡದ ಸಂದರ್ಭದಲ್ಲಿ ಪ್ರತಿ ಹೆಕ್ಟೇರಿಗೆ 5 ಕೆ.ಜಿ. ಟ್ರೈಕೋಡರ್ಮಾ/ಸೂಡೋಮೊನಾಸ್ ವನ್ನು ಚೆನ್ನಾಗಿ ಕಳಿತ 5 ಟನ್ ಕೊಟ್ಟಿಗೆ ಗೊಬ್ಬರದೊಂದಿಗೆ ಸೇರಿಸಿ ಬಳಸಬಹುದು.

ಅಥವಾ ಇನ್ನಿತರ ವಸ್ತುಗಳಾದ ತೆಂಗಿನನಾರು, ಕಳಿತ ಗೊಬ್ಬರ ಹಾಗೂ ಜಿಪಂ ಜೊತೆ ಕೂಡಿಸಿ ಮಣ್ಣಿಗೆ ಹಾಗೂ ತೋಟಗಾರಿಕೆ ಗಿಡದ ಬುಡಗಳಿಗೆ ಹಾಕಲು ಉತ್ತಮ.

2. ರಾಸಾಯನಿಕ ಬೀಜೋಪಚಾರ

ಈ ವಿಧಾನದಲ್ಲಿ ವಿವಿಧ ಬಗೆಯ ರಾಸಾಯನಿಕಗಳನ್ನು ಬಳಸಿ ಬೀಜಗಳಿಗೆ ಉಪಚರಿಸಬಹುದು. ಇದರಿಂದ ಶಿಲೀಂಧ್ರ ರೋಗಗಳು, ದುಂಡಾಣು ರೋಗಗಳು, ಜಂತು ರೋಗಗಳು, ಬೀಜ ಕೊಳೆರೋಗಗಳು, ಮಣ್ಣಿನಿಂದ ಹರಡುವ ರೋಗಗಳು, ರಸ ಹೀರುವ ಕೀಟಗಳನ್ನು ಸುಲಭವಾಗಿ ತಡೆಯಬಹುದು.

ಏಕದಳ ಧಾನ್ಯಗಳು –
ಭತ್ತದಲ್ಲಿ ಬಿತ್ತನೆ ಬೀಜವನ್ನು 2 ಗ್ರಾಂ ಕಾರ್ಬನ್‌ ಡೈಜಿಮ್ ಅಥವಾ 01 ಗ್ರಾಂ ಸ್ಟೆಸ್ಟೋಸೈಕ್ಲಿನ್ ಮತ್ತು 0.1 ಗ್ರಾಂ ಮೈಲುತುತ್ತ ಅಥವಾ 0.5 ಗ್ರಾಂ ತಾಮ್ರದ ಆಕ್ಸಿಕ್ಲೋರೈಡ್ ಒಂದು ಲೀಟ‌ರ್ ನೀರಿನಲ್ಲಿ ಕರಗಿಸಿ 20 ನಿಮಿಷಗಳ ಕಾಲ ನೆನೆಸಬೇಕು ಇವರಿಂದ ಭತ್ತದಲ್ಲಿ ಬರುವ ಬೀಜದಿಂದ ಹರಡಬಹುದಾದ ಬೆಂಕಿ ರೋಗ, ಎಲೆ ಕವಚದ ರೋಗ, ದುಂಡಾಣು ಮಚ್ಚೆ ರೋಗಗಳನ್ನು ನಿಯಂತ್ರಿಸಬಹುದು.

ಜೋಳದ ಉತ್ತಮ ಮೊಳಕೆ ಪ್ರಮಾಣ. ಸಸಿ ಬೆಳವಣಿಗೆ ಮತ್ತು ಸುಳಿನೊಣದ ಬಾಧೆ ನಿಯಂತ್ರಿಸಲು 30 ಗ್ರಾಂ ಸುಣ್ಣವನ್ನು ಒಂದುವರೆ ಲೀಟರ್ ನೀರಿನಲ್ಲಿ ಕರಗಿಸಿ ಇದಕ್ಕೆ 2 ಮಿ ಲೀ ಕ್ಲೋರೋಪೈರಿಫಾಸ್ 20 ಇ.ಸಿ. ಬೆರೆಸಿ 6-8 ಗಂಟೆ ಕಾಲ ನೆನೆಸಿ ನಂತರ ನೆರಳಿನಲ್ಲಿ ಚೆನ್ನಾಗಿ ಒಣಗಿಸಿ ನಂತರ ಬಿತ್ತನೆಗೆ ಉಪಯೋಗಿಸಬೇಕು. ಜೋಳದ ಕಾಡಿಗೆ ರೋಗ ನಿಯಂತ್ರಿಸಲು ಪ್ರತಿ ಕಿ.ಗ್ರಾಂ ಬೀಜಕ್ಕೆ 2 ಗ್ರಾಂ. ಗಂಧಕದ ಪುಡಿ ಅಥವಾ ಥೈರಾಮ್ ನಿಂದ ಉಪಚರಿಸಬೇಕು.

ಗೋವಿನ ಜೋಳದಲ್ಲಿ ಉರಿಜಿಂಗಿ ರೋಗದ ಹತೋಟಿಗಾಗಿ ಪ್ರತಿ ಕಿ.ಗ್ರಾಂ ಬೀಜಕ್ಕೆ 25 ಗ್ರಾಂ ಅಸ್ಪಿರುಲಂ ಹಾಗೂ 6 ಗ್ರಾಂ ಟ್ರೈಕೋಡರ್ಮ ಜೈವಿಕ ಶಿಲೀಂಧ್ರನಾಶಕಗಳಿಂದ ಬೀಜೋಪಚಾರ ಮಾಡಿ ಬಿತ್ತನೆ ಮಾಡುವುದು.

ದ್ವಿದಳ ಧಾನ್ಯ –
ಹೆಸರು, ಉದ್ದು, ಅಲಸಂದಿ, ಕಡಲೆ ನೆಟೆ ರೋಗ/ಸೊರಗು ರೋಗ, ಬೇರು ಕೊಳೆ ರೋಗ, ಚುಕ್ಕೆ ರೋಗ ಮತ್ತು ಚಿಬ್ಬು ರೋಗದ ಹತೋಟಿಗಾಗಿ ಬಿತ್ತುವಾಗ ಪ್ರತಿ ಕಿ.ಜಿ. ಬೀಜಕ್ಕೆ 4 ಗ್ರಾಂ ಟ್ರೈಕೋಡರ್ಮ ಜೈವಿಕ ಶಿಲೀಂಧ್ರನಾಶಕವನ್ನು ಲೇಪನ ಮಾಡಿ ಮಾಡಬೇಕು ಅಥವಾ ರಾಸಾಯನಿಕ ಪದ್ದತಿಯಲ್ಲಿ 2 ಗ್ರಾಂ ಕ್ಯಾಪ್ಯಾನ್ ಅಥವಾ ಥೈರಾಮ್ ಅಥವಾ ಕಾರ್ಬಂಡೈಜಿಮ್ ಶಿಲೀಂಧ್ರನಾಶಕದಿಂದ ಬೀಜೋಪಚಾರ ಮಾಡಬೇಕು. ತದ ನಂತರ ಥೈಯೋಮಿಥಾಕ್ಸಾಮ್ 30 ಎಫ್. ಎಸ್. ಕೀಟನಾಶದಿಂದ – 10 ಮಿ.ಲೀ. ಪ್ರತಿ ಕೆ.ಜಿ. ಬೀಜಕ್ಕೆ ಬೀಜೋಪಚಾರ ಮಾಡುವುದರಿಂದ ರಸ ಹೀರುವ ಕೀಟಗಳ ಹತೋಟಿ ಮಾಡಬಹುದು.

ಎಣ್ಣೆಕಾಳು ಬೆಳೆಗಳು –
ಮುಖ್ಯವಾಗಿ ಶೇಂಗಾ ಮತ್ತು ಸೋಯಾಅವರೆಯಲ್ಲಿ ಕಂಡುಬರುವ ಬೀಜಕೊಳೆ ಮತ್ತು ಕಪ್ಪು ಕೊಳೆ ರೋಗಗಳ ಹತೋಟಿಗಾಗಿ ಪ್ರತಿ ಕಿ.ಗ್ರಾಂ ಬೀಜಕ್ಕೆ 3 ಗ್ರಾಂ (ಕಾರ್ಬಾಕ್ಸಿನ್ + ಥೈರಾವಮ್) – ವೈಟಾವ್ಯಾಕ್ಸ್ ಪವರ್ ಶಿಲೀಂಧ್ರನಾಶಕಗಳಿಂದ ಬೀಜೋಪಚಾರ ಮಾಡಬೇಕು. ನಂತರ, ಥೈಯಾಮೆಥಾಕ್ಸಾಮ್ 30 ಎಫ್.ಎಸ್. 10 ಮಿ.ಲೀ. ಪ್ರತಿ ಕೆ.ಜಿ. ಬೀಜಕ್ಕೆ ಬೀಜೋಪಚಾರ ಮಾಡುವುದರಿಂದ ಸೋಯಾಅವರೆಯಲ್ಲಿ ಕಂಡುಬರುವ ಕಾಂಡ ಕೊರೆಯುವ ಕೀಟವನ್ನು ಹತೋಟಿ ಮಾಡಬಹುದು.

ವಿಶೇಷ ಸೂಚನೆ:
ಶೇಂಗಾ ಮತ್ತು ಸೋಯಾಅವರೆಯಲ್ಲಿ ಬೀಜದ
ಹೊರಭಾಗದ ಸಿಪ್ಪೆ (ಸೀಡ್ ಕೋಟ್) ತುಂಬಾ ಮೃದುವಾಗಿರುವುದರಿಂದ, ಬಹಳಷ್ಟು ಎಚ್ಚರಿಕೆ ವಹಿಸಿ ಬೀಜೋಪಚಾರ ಮಾಡಬೇಕು. ಇಲ್ಲದೇ ಹೋದಲ್ಲಿ ಸೀಡ್ ಕೋಟ್ ಡ್ಯಾಮೇಜ್ ಹಾಗಿ ಬೀಜದ ಮೊಳಕೆ ಪ್ರಮಾಣ ಕಡಿಮೆ ಆಗುವ ಸಾಧ್ಯತೆ ಹೆಚ್ಚು.

ಶೇಂಗಾ ಬೆಳೆಯುವ ಕೆಲವೊಂದು ಭಾಗಗಳಲ್ಲಿ ಗೊಣ್ಣೆಹುಳುವಿನ ಸಮಸ್ಯೆ ಹೆಚ್ಚಾಗಿ ಕಂಡುಬರುತ್ತಾ ಇದೆ. ಇದರ ಹತೋಟಿಗಾಗಿ, ಪ್ರತಿ ಕೆ.ಜಿ. ಬೀಜಕ್ಕೆ 12 ಮಿ.ಲೀ. ಕ್ಲೋರ್‌ಪೈರಿಫಾಸ್ 20 ಇ.ಸಿ. ಕೀಟನಾಶಕವನ್ನು ಬೀಜೋಪಚಾರ ಮಾಡಬೇಕು.

ಸೂರ್ಯಕಾಂತಿ ಬೀಜವನ್ನು ಬಿತ್ತುವ ಮೊದಲು 10-12 ಗಂಟೆ ನೀರಿನಲ್ಲಿ ನೆನೆಸಿ ಒಣಗಿಸಿ. ನಂತರ ಮೆಟಲಾಕ್ಸಿಲ್ ಶಿಲೀಂಧ್ರನಾಶಕ (6 ಗ್ರಾಂ. ಪ್ರತಿ ಕೆ.ಜಿ. ಬೀಜಕ್ಕೆ) ದಿಂದ ಉಪಚರಿಸಿದಲ್ಲಿ ಕೇದಿಗೆ ರೋಗವನ್ನು ನಿಯಂತ್ರಿಸಬಹುದು.

ಹತ್ತಿಯಲ್ಲಿ ರಸ ಹೀರುವ ಕೀಟ ನಿಯಂತ್ರಿಸಲು ಇಮಿಕಾಕ್ಲೋಪ್ರಿಡ್ 70 ಡಬ್ಲೂ.ಎಸ್. (5 ಮಿ.ಲೀ. ಪ್ರತಿ ಕೆ.ಜಿ. ಬೀಜಕ್ಕೆ) ನಿಂದ ಬೀಜೋಪಚಾರ ಮಾಡಿ ಬಿತ್ತನೆ ಮಾಡಬೇಕು. ಇದರಿಂದ ಬೆಳೆಗೆ 25-30 ದಿವಸಗಳ ಕಾಲ ರಸ ಹೀರುವ ಕೀಟಗಳ ಬಾಧೆ ಕಡಿಮೆ ಮಾಡಬಹುದು.

ಬೀಜೋಪಚಾರದಿಂದಾಗುವ ಲಾಭಗಳು ಏನು?

* ಬೀಜೋಪಚಾರ ಮಾಡಿ ಬಿತ್ತುವುದರಿಂದ 25-30 ದಿನಗಳ ಕಾಲ ಬೆಳೆಗಳಿಗೆ ಯಾವುದೇ ರೀತಿಯ ರೋಗ ಮತ್ತು ಕೀಟಗಳು ಕಂಡು ಬರುವುದಿಲ್ಲ.
* ಇದರಿಂದ ಸಿಂಪರಣೆಗೆ ಬೇಕಾದ ಖರ್ಚು ಕಡಿಮೆಯಾಗುತ್ತದೆ.
* ಬೆಳೆಗಳಲ್ಲಿ ಯಾವುದೇ ನಷ್ಟವಾಗದೇ ಉತ್ತಮ ಇಳುವರಿಯನ್ನು ಪಡೆದುಕೊಂಡು ಉತ್ತಮ ಲಾಭವನ್ನು ಗಳಿಸಬಹುದು.
* ಬೆಳೆಯಿಂದ ಬೆಳೆಗೆ ಬೀಜಗಳ ಮುಖಾಂತರ ಹರಡುವ ರೋಗಗಳನ್ನು ನಿಯಂತ್ರಿಸಬಹುದು.

ರೈತರು ಬೀಜೋಪಚಾರ ಮಾಡುವಾಗ ಗಮನಿಸಬೇಕಾದ ಅಂಶಗಳು –

* ಜೈವಿಕ ರೋಗನಾಶಕದ ಪ್ಯಾಕೇಟನ್ನು ತಂಪಾದ ಸ್ಥಳದಲ್ಲಿಡಿರಿ.
* ಬೀಜೋಪಚಾರದ ಪ್ಯಾಕೆಟ್ ಮೇಲೆ ಬರೆದಿರುವ ಅಂಶಗಳನ್ನು (ಪ್ರಮುಖವಾಗಿ Expiry date) ಓದಿ ತಿಳಿದುಕೊಳ್ಳಬೇಕು.
* ಮಣ್ಣಿನಲ್ಲಿ ಸೂಕ್ತ ತೇವಾಂಶ ಕಾಪಾಡುವುದರಿಂದ ಜೈವಿಕ ಶಿಲೀಂಧ್ರನಾಶಕಗಳ ಚಟುವಟಿಕೆ ಹೆಚ್ಚಿಸಬಹುದಾಗಿದೆ.
* ರಾಸಾಯನಿಕ ಶಿಲೀಂಧ್ರ ಮತ್ತು ಕೀಟನಾಶಕಗಳು ಉತ್ತಮ ಗುಣಮಟ್ಟದ್ದಾಗಿರಬೇಕು ಮತ್ತು ಅವು ಬೀಜದ ಗುಣಮಟ್ಟವನ್ನು ಹೆಚ್ಚಿಸುವಂತಿರಬೇಕು.
* ಬೀಜಗಳಿಗೆ ಯಾವುದೇ ಹಾನಿ ಮಾಡಬಾರದು.
* ಬೀಜೋಪಚಾರವನ್ನು ಶಿಫಾರಸು ಮಾಡಿದ ಅಗತ್ಯ ಪ್ರಮಾಣದಲ್ಲಿ ಉಪಯೋಗಿಸಬೇಕು.
* ರಾಸಾಯನಿಕ ಬೀಜೋಪಚಾರವನ್ನು ಮಾಡುವಾಗ ಕೈಗೌಸು ಹಾಕಿರಬೇಕು.
* ಉಪಚಾರ ಮಾಡಿದ ಬೀಜವನ್ನು ಯಾವುದೇ ಕಾರಣಕ್ಕೂ ಆಹಾರವಾಗಿ ಉಪಯೋಗಿಸಬಾರದು, ಹೊರಗೆ ಚೆಲ್ಲಬಾರದು. ಇದರಿಂದ ಪ್ರಾಣಿ-ಪಕ್ಷಿಗಳಿಗೂ ಅವು ಹಾನಿಕಾರಕ.

ಹೆಚ್ಚಿನ ಮಾಹಿತಿ ಅವಶ್ಯವಿದ್ದಲ್ಲಿ ತಜ್ಞರ ಸಲಹೆ ಪಡೆಯಬೇಕು. ವಿವರಗಳಿಗೆ ಸಂಪರ್ಕಿಸಿ ಸಂಪಾದಕರು, ಪ್ರಕಟಣಾ ಕೇಂದ್ರ, ಕೃಷಿ ವಿಶ್ವವಿದ್ಯಾಲಯ, ಧಾರವಾಡ 580005
ದೂರವಾಣಿ: 0022-9280280