ಪ್ರೀಯ ರೈತರೇ ಇವತ್ತು ನಾವು ಜೇನು ಕೃಷಿ ಬಗ್ಗೆ ಮಾಹಿತಿ ತಿಳಿಯೋಣ. ಇತ್ತೀಚಿನ ದಿನಗಳಲ್ಲಿ ನೌಕರಿ ಮಾಡುವುದಕ್ಕಿಂತ ಸ್ವಂತ ಉದ್ಯೋಗ ಮಾಡುವುದು ಬಹಳ ಲಾಭದಾಯಕವಾಗುತ್ತಿದೆ. ಹೀಗಾಗಿಯೇ ಗ್ರಾಮೀಣ ಪ್ರದೇಶದ ಜನರು ಕೃಷಿ ಆಧಾರಿತ ವ್ಯವಹಾರಗಳತ್ತ ಗಮನ ಹರಿಸುತ್ತಿದ್ದಾರೆ. ಕೇಂದ್ರ ಸರ್ಕಾರ ಕೆಲವು ವರ್ಷಗಳ ಹಿಂದೆ ಆರಂಭಿಸಿರುವ ಆತ್ಮನಿರ್ಭರ ಯೋಜನೆಯಡಿ ದೇಶೀಯ ಉತ್ಪನ್ನಗಳಿಗೆ ಪ್ರೋತ್ಸಾಹ ನೀಡುತ್ತಿದೆ.

ಇದರಲ್ಲಿ ಜೇನು ಕೃಷಿಗೆ ಅತ್ಯುತ್ತಮ ಉತ್ತೇಜನ ಸಿಗುತ್ತಿದೆ. ಯುವಕ ಯುವತಿಯರು ನಿರುದ್ಯೋಗದಿಂದ ಬಳಲುವ ಬದಲು, ಕೇವಲ ನೌಕರಿ ಹುಡುಕುತ್ತ ಕಾಲ ಕಳೆಯುವ ಬದಲು ಜೇನು ಸಾಕಾಣಿಕೆ ಮಾಡಬಹುದು, ಅದರಲ್ಲೂ ಹೆಣ್ಣು ಮಕ್ಕಳಿಗೆ ಜೇನು ಸಾಕಣೆಯು ಹಣಗಳಿಸಲು ಉತ್ತಮ ಆಯ್ಕೆಯಾಗಿದೆ. ಹಣ್ಣು ಮಕ್ಕಳು ತಮ್ಮ ಮನೆಯ ಹಿತ್ತಲಲ್ಲೇ ಜೇನು ಪೆಟ್ಟಿಗೆಯನ್ನು ಇಟ್ಟು ಜೇನು ಸಾಕಾಣಿಕೆ ಮಾಡಬಹುದು. ಇದಕ್ಕಾಗಿ ಜೇನು ನೊಣಗಳ ವಿಧಗಳು ಮತ್ತು ಸಾಕಾಣಿಕೆಯ ಬಗ್ಗೆ ಸ್ವಲ್ಪ ಜ್ಞಾನವಿದ್ದರೆ ಹೆಚ್ಚಿನ ಲಾಭ ಗಳಿಸುವುದರಲ್ಲಿ ಸಂಶಯವೇ ಇಲ್ಲ.

ಕೋವಿಡ್ ಸಂದಿಗ್ಧ ಪರಿಸ್ಥಿತಿಯಲ್ಲಿ ಹೆಸರುವಾಸಿಯಾದ ಐಟಿ ಕಂಪೆನಿಗಳಿಂದ ಕೆಲಸ ಕಳೆದುಕೊಂಡ ಐಟಿ ಪದವಿಧರರು ತಮ್ಮ ತಮ್ಮ ಗ್ರಾಮಗಳಿಗೆ ಮರಳಿ ಕೃಷಿ ಹಾಗೂ ಕೃಷಿಯೇತರ ಚಟುವಟಿಕೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡು ಯಶಸ್ಸು ಸಾಧಿಸುತ್ತಿರುವ ಘಟನೆಗಳಂತೂ ನಮ್ಮ ಕಣ್ಣ ಮುಂದಿದೆ. ಈಗಿನ ಐಟಿ ಯುವಕರಲ್ಲಿ ಕೃಷಿಯೇತರ ಚಟುವಟಿಕೆಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡು ನವ ಉತ್ಸಾಹದ ಚಿಲುಮೆಯಾಗಿದ್ದಾರೆ. ಅದರಲ್ಲೂ ಜೇನುಕೃಷಿ ಎಂದರೆ ಬಹಳಷ್ಟು ಜನಕ್ಕೆ ಅಚ್ಚುಮೆಚ್ಚು

ಭೂಮಿಯ ಮೇಲೆ ಇರುವ ವಿವಿಧ ಬಗೆಯ ಕೀಟಗಳಲ್ಲಿ ಜೇನು ನೊಣಗಳು ಮಾನವನಿಗೆ ಬಹು ಉಪಕಾರಿಯಾಗಿವೆ. ಭಾರತವು ಪ್ರತಿ ವರ್ಷ 27,000 ಟನ್ ಜೇನು ಉತ್ಪಾದಿಸುತ್ತದೆ. ಅದರಲ್ಲಿ ಶೇ. 20 ರಿಂದ 25 ರಷ್ಟು (7.000 ಟನ್) ಜೇನನ್ನು ರಫ್ತು ಮಾಡಲಾಗುತ್ತಿದೆ. ಆದರೆ ಭಾರತದಲ್ಲಿರುವ ಸಂಪನ್ಮೂಲಗಳನ್ನು ನೋಡಿದಾಗ ಪ್ರಸ್ತುತ ಜೇನು ಉತ್ಪಾದನೆ ತುಂಬಾ ಕಡಿಮೆ.

ಒಂದು ಅಂದಾಜಿನಂತೆ ಭಾರತದಲ್ಲಿ 120 ಮಿಲಿಯನ್ ಜೇನು ಕುಟುಂಬಗಳನ್ನು ಸಾಕಬಹುದಾಗಿದೆ. ಇದರಿಂದಾಗಿ 6 ಮಿಲಿಯನ್ ಜನರಿಗೆ ಉದ್ಯೋಗ, 1.2 ಮಿಲಿಯನ್ ಟನ್ ಜೇನು ಉತ್ಪಾದನೆ ಮತ್ತು 15,000 ಟನ್ನಷ್ಟು ಮೇಣ ತಯಾರಿಸಬಹುದು. ಜೇನು ಉತ್ಪನ್ನಗಳ ಸುಮಾರು 20 ಪಟ್ಟು ಹೆಚ್ಚು ಉಪಯೋಗ, ಜೇನುನೊಣಗಳು ನಡೆಸುವ ಪರಾಗಸ್ಪರ್ಶ ಕ್ರಿಯೆಯಿಂದ ಉಂಟಾಗುತ್ತದೆ.

ಕೆಲವು ಸಮೀಕ್ಷೆಗಳ ಪ್ರಕಾರ ಶೇ. 30 ರಷ್ಟು ಆಹಾರ ಬೆಳೆಗಳು, ಶೇ. 80 ರಷ್ಟು ಹಣ್ಣು, ತರಕಾರಿ ಮತ್ತು ಅರಣ್ಯ ಬೆಳೆಗಳು ಹಾಗೂ ಶೇ. 60 ಕ್ಕಿಂತಲೂ ಹೆಚ್ಚು ಬೀಜದಿಂದ ವಂಶಾಭಿವೃದ್ಧಿ ಹೊಂದುವ ಸಸ್ಯಗಳು ಪರಾಗಸ್ಪರ್ಶಕ್ಕಾಗಿ ಜೇನುನೊಣಗಳನ್ನೇ ಅವಲಂಬಿಸಿವೆ (ಆಧಾರ: ಅಂತರ್ಜಾಲ).

ಜೇನು ನೊಣದ ವಿಧಗಳು –

1. ಮುಳ್ಳಿನ ಕೊಂಡಿಯಿಲ್ಲದ ರಾಳ ಜೇನು (ಟೈಗೋನಾ ಇರಿಡಿಪೆನಿಸ್: ಮುಳ್ಳಿನ ಕೊಂಡಿಯಿಲ್ಲದ ರಾಳ ಜೇನುನೊಣಗಳನ್ನು ಕೂಡ ಸಾಕಬಹುದಾಗಿದೆ. ಆದರೆ ಒಂದು ಜೇನುಗೂಡಿಗೆ ವರ್ಷಕ್ಕೆ ಜೇನು ಇಳುವರಿ ತುಂಬಾ ಕಡಿಮೆ ಅಂದರೆ ಕೇವಲ 100 ಗ್ರಾಂ.
2. ಮುಳ್ಳಿನ ಕೊಂಡಿಯಿರುವ ಹೆಚ್ಚೇನು (ಎಫಿಸ್ ಡೋರ್ಪಾಟ: ಮುಳ್ಳಿನ ಕೊಂಡಿಯಿರುವ ಹೆಚ್ಚೇನು ನೊಣಗಳು ವರ್ಷಕ್ಕೆ ಒಂದು ಜೇನುಗೂಡಿಗೆ ಸುಮಾರು 36 ಕೆ. ಜಿ. ಜೇನುತುಪ್ಪವನ್ನು ಉತ್ಪಾದಿಸುತ್ತವೆ. ಎಲ್ಲಾ ಜೇನುನೋಣಗಳಲ್ಲಿ ಈ ಜೇನುನೊಣ ದೊಡ್ಡದಾಗಿದೆ. ಈ ಜೇನುನೋಣಗಳು ತುಂಬಾ ಕ್ರೂರವಾಗಿದ್ದು ಇವುಗಳನ್ನು ಸಾಕುವುದು ಕಷ್ಟ,
3. ಕೋಲು ಜೇನು (ಎಫಿಸ್ ಫ್ಲೋರಿಯಾ): ಕೋಲು ಜೇನುನೊಣಗಳು ವರ್ಷಕ್ಕೆ ಒಂದು ಜೇನುಗೂಡಿಗೆ ಸುಮಾರು ಅರ್ಧ ಕೆ. ಜಿ. ಜೇನುತುಪ್ಪವನ್ನು ಉತ್ಪಾದಿಸುತ್ತವೆ. ಇವು ಆಗಾಗ್ಗೆ ತಮ್ಮ ಸ್ಥಳವನ್ನು ಬದಲಾಯಿಸುವುದರಿಂದ ಇವುಗಳನ್ನು ಸಾಕಲಾಗುವುದಿಲ್ಲ.
4. ತುಡುವೆ ಜೇನು (ಎಫಿಸ್ ಸೆರೆನಾ ಇಂಡಿಕಾ): ತುಡುವೆ ಜೇನುನೊಣಗಳು ಸಾಕಲು ಯೋಗ್ಯವಾಗಿದ್ದು, ಪ್ರತಿ ವರ್ಷಕ್ಕೆ ಸರಾಸರಿ 6-8 ಕೆ. ಜಿ. ಜೇನು ಇಳುವರಿಯೊಂದಿಗೆ ಅನೇಕ ಸಮಾನಾಂತರ ಎರಿಗಳನ್ನು ನಿರ್ಮಿಸುತ್ತವೆ.
5. ಎಫಿಸ್ ಮೆಲ್ಲಿಫೆರಾ – ಜೇನುನೋಣಗಳು ಸಮಾನಾಂತರ ಎರಿಗಳನ್ನು ನಿರ್ಮಿಸುವ ತುಡುವೆ ಜೇನುನೊಣಗಳಿಗೆ ಹೋಲುತ್ತವೆ. ಪ್ರತಿ ವರ್ಷಕ್ಕೆ ಸರಾಸರಿ 25-40 ಕೆ. ಜಿ. ಯಷ್ಟು ಜೇನುತುಪ್ಪವನ್ನು ಉತ್ಪಾದಿಸುವ ಪ್ರಭೇಧವಾಗಿದೆ. ಇವುಗಳನ್ನು ಜೇನು ಸಾಕಾಣಿಕೆದಾರರು ಸುಲಭವಾಗಿ ಬೆಳೆಸಬಹುದಾಗಿದೆ.

ಜೇನು ಸಾಕಾಣಿಕೆ ತರಬೇತಿ –

ಕೃಷಿ ವಿಜ್ಞಾನ ಕೇಂದ್ರ, ಕೃಷಿ ವಿಶ್ವವಿದ್ಯಾಲಯ, ಸರ್ಕಾರೇತರ ಸಂಘ ಸಂಸ್ಥೆಗಳು, ತಾಂತ್ರಿಕವಾಗಿ ನಿಪುಣವಾಗಿರುವ ನಿವೃತ್ತ ಮತ್ತು ಜೇನು ಕೃಷಿ ವಿಷಯದಲ್ಲಿ ಪರಿಣಿತರಾದ ಯಾವುದೇ ಸಂಪನ್ಮೂಲ ವ್ಯಕ್ತಿಯು ರೈತರಿಗೆ ಹಾಗೂ ಜೇನು ಕೃಷಿ ಆಸಕ್ತರಿಗೆ ಜೇನು ಕೃಷಿಯಲ್ಲಿ ತರಬೇತಿ ನೀಡುತ್ತಾರೆ. ಹೆಚ್ಚಾಗಿ ತರಬೇತಿಗಳನ್ನು ಕೃಷಿ ವಿಜ್ಞಾನ ಕೇಂದ್ರಗಳಲ್ಲಿ ಆಯೋಜಿಸಲಾಗುತ್ತದೆ. ರೈತರು/ಆಸಕ್ತರು ಜೇನು ಪೆಟ್ಟಿಗೆಯನ್ನು ತೋಟಗಾರಿಕೆ ಇಲಾಖೆಯಿಂದ ತೆಗೆದುಕೊಳ್ಳಬಹುದು. ತೋಟಗಾರಿಕೆ ಇಲಾಖೆಯ ವತಿಯಿಂದ ವರ್ಷಕ್ಕೊಮ್ಮೆ ಜೇನು ಪೆಟ್ಟಿಗೆಯನ್ನು ಕೊಡುತ್ತಾರೆ. ಒಬ್ಬರಿಗೆ ಒಂದರಂತೆ ಜೇನು ಪೆಟ್ಟಿಗೆಯನ್ನು ಕೊಡಲಾಗುತ್ತದೆ. ಕೃಷಿ ವಿಜ್ಞಾನ ಕೇಂದ್ರಗಳಲ್ಲಿ ಜೇನು ಪೆಟ್ಟಿಗೆ ಎಲ್ಲೆಲ್ಲಿ ಸಿಗುತ್ತದೆ ಎಂಬ ಮಾಹಿತಿಯನ್ನು ಕೊಡಲಾಗುತ್ತದೆ.

ಒಂದು ಜೇನು ಪೆಟ್ಟಿಗೆಗೆ ರೂ.2000/-, ಒಂದು ಜೇನು ಕುಟುಂಬಕ್ಕೆ ರೂ.2000/- ಹಾಗೂ ಒಂದು ಸ್ಟ್ಯಾಂಡ್ ಗೆ ರೂ.500/- ಗಳನ್ನು ನಿಗದಿಗೊಳಿಸಲಾಗಿದೆ. ಒಟ್ಟಾರೆಯಾಗಿ ನಮಗೆ ರೂ.4500/- ಗಳಲ್ಲಿ ದೊರೆತಂತಾಗುತ್ತದೆ. ಅಲ್ಲದೇ ಜೇನು ಪೆಟ್ಟಿಗೆಯನ್ನು ಜೇನು ಸಾಕಾಣಿಕೆ ಮಾಡುವ ಸಹಕಾರ ಸಂಘ ಮತ್ತು ಪ್ರಗತಿಪರ ರೈತರಿಂದಲೂ ಖರೀದಿಸಬಹುದು. ಉದಾಹರಣೆಗೆ ಶಿರಸಿ ಹಾಗೂ ಅಂಕೋಲ ಜೇನು ಉತ್ಪಾದಕರ ಸಹಕಾರ ಸಂಘ (ಉತ್ತರ ಕನ್ನಡ ಜಿಲ್ಲೆ), ಮಧುಕೇಶ್ವರ ಹೆಗಡೆ, ತಾರಗೋಡು, ಶಿರಸಿ ಮತ್ತು ಧರ್ಮೇಂದ್ರ ಗಣಪತಿ ಹೆಗಡೆ, ಮರಿಗದ್ದೆ, ಶಿರಸಿ ಇವರಿಂದಲೂ ಖರೀದಿಸಬಹುದು.

ದೇಶದಲ್ಲಿ ಸಮಗ್ರ ಕೃಷಿ ವ್ಯವಸ್ಥೆಯ ಭಾಗವಾಗಿರುವ ಜೇನುಸಾಕಣೆಯ ಪ್ರಾಮುಖ್ಯತೆಯನ್ನು ಗಮನದಲ್ಲಿಟ್ಟುಕೊಂಡು, ಸರ್ಕಾರವು ಮೂರು ವರ್ಷಗಳವರೆಗೆ (2020-21 ರಿಂದ 2022-23) ರಾಷ್ಟ್ರೀಯ ಜೇನುಸಾಕಣೆ ಮತ್ತು ಜೇನು ಮಿಷನ್ ಗೆ (NBHM) 500 ಕೋಟಿ ರೂ ಅನ್ನು ಆತ್ಮನಿರ್ಭರ್ ಭಾರತ್ ಯೋಜನೆಯ ಭಾಗವಾಗಿ ಘೋಷಿಸಲಾಗಿದೆ.

ರಾಷ್ಟ್ರೀಯ ಜೇನುಸಾಕಣೆ ಮತ್ತು ಜೇನು ಮಿಷನ್, ದೇಶದಲ್ಲಿ ‘ಸಿಹಿ ಕ್ರಾಂತಿ’ಯನ್ನು ಸಾಧಿಸಲು ವೈಜ್ಞಾನಿಕ ಜೇನುಸಾಕಣೆಯನ್ನು ಪ್ರಚಾರ ಪಡಿಸುತ್ತಿದೆ. ಅಲ್ಲದೇ ಅಭಿವೃದ್ಧಿಯ ಗುರಿಯನ್ನು ಹೊಂದುವಲ್ಲಿ ಶ್ರಮಿಸುತ್ತಿದೆ. ಇದನ್ನು ರಾಷ್ಟ್ರೀಯ ಜೇನುನೊಣ ಮಂಡಳಿಯ (NBB) ಮೂಲಕ ಜಾರಿಗೊಳಿಸಲಾಗುತ್ತಿದೆ.

ಕೃಷಿ/ತೋಟಗಾರಿಕೆ ಉತ್ಪಾದನೆಯನ್ನು ಹೆಚ್ಚಿಸಲು, ಸಮಗ್ರ ಜೇನುಸಾಕಣೆ ಅಭಿವೃದ್ಧಿ ಕೇಂದ್ರ (IBDC) ಸ್ಥಾಪನೆ ಸೇರಿದಂತೆ ಮೂಲಸೌಕರ್ಯಗಳನ್ನು ಅಭಿವೃದ್ಧಿಪಡಿಸುವುದು, ಕೃಷಿ ಮತ್ತು ಕೃಷಿಯೇತರ ಕುಟುಂಬಗಳಿಗೆ ಆದಾಯ ಮತ್ತು ಉದ್ಯೋಗ ಸೃಷ್ಟಿಗಾಗಿ ಜೇನುಸಾಕಣೆ, ಉದ್ಯಮದ ಸಮಗ್ರ ಬೆಳವಣಿಗೆಯನ್ನು ಉತ್ತೇಜಿಸುವುದು ರಾಷ್ಟ್ರೀಯ ಜೇನುಸಾಕಣೆ ಮತ್ತು ಜೇನು ಮಿಷನ್ ನ ಮುಖ್ಯ ಉದ್ದೇಶವಾಗಿದೆ. ಇದರಲ್ಲಿ ಜೇನು ಪರೀಕ್ಷಾ ಪ್ರಯೋಗಾಲಯಗಳು, ಜೇನುನೊಣಗಳ ರೋಗ ಪತ್ತೆಹಚ್ಚುವಿಕೆಯ ಪ್ರಯೋಗಾಲಯಗಳು, ಜೇನುನೊಣ ಚಿಕಿತ್ಸೆ ಕೇಂದ್ರಗಳ ಸ್ಥಾಪನೆ ಮತ್ತು ಜೇನುಸಾಕಣೆಯ ಮೂಲಕ ಮಹಿಳೆಯರ ಸಬಲೀಕರಣ ಕೂಡ ಸೇರಿದೆ.

ಬದುಕು ಬದಲಿಸಿದ ಜೇನು ಕೃಷಿ –

ಶಿರಸಿ ತಾಲೂಕಿನ ತಾರಗೋಡ ಗ್ರಾಮದ ಜೇನು ಕೃಷಿಕ ಶ್ರೀ. ಮಧುಕೇಶ್ವರ ಹೆಗಡೆಯವರು ಕಳೆದ 35 ವರ್ಷಗಳ ಹಿಂದೆ ಕೇವಲ 50 ಜೇನು ಕಾಲೋನಿಗಳನ್ನು ಇಟ್ಟುಕೊಂಡು ಜೇನು ಕೃಷಿ ಪ್ರಾರಂಭಿಸಿ ವರ್ಷಕ್ಕೆ 1,500ಕ್ಕೂ ಹೆಚ್ಚು ಪೆಟ್ಟಿಗೆಗಳಲ್ಲಿ ಜೇನು ಬೆಳೆಸುತ್ತಿದ್ದಾರೆ. ವಾರ್ಷಿಕ ಸರಾಸರಿ 4.5 ಟನ್ ವಿವಿಧ ತರಹದ ಜೇನುತುಪ್ಪ ಉತ್ಪಾದಿಸುತ್ತಿದ್ದಾರೆ. ಉದಾಹರಣೆಗೆ ನೇರಳೆ ಜೇನಾತುವ ತುಳಸಿ ಜೇನುತುವ, ಬೆಟ್ಟದ ನೆಲ್ಲಿ ಜೇನುತುಪ್ಪ, ಅಂಟವಾಳ ಜೇನುತುಪ್ಪ, ವನಸ್ಪತಿ ಜೇನುತುಪ್ಪಗಳನ್ನು ಉತ್ಪಾದಿಸುತ್ತಿದ್ದಾರೆ.

ಇದಲ್ಲದೇ ಮಿಸರಿ ಜೇನು ಕೃಷಿ ಸಹ ಮಾಡುತ್ತಿದ್ದು, ಜೇನಿನ ಮಕರಂದಗಳನ್ನು ಸಂಗ್ರಹಿಸಿ ಔಷಧಿಗೆ ಸಹ ಬಳಕೆ ಮಾಡುತ್ತಿದ್ದಾರೆ. ಅಷ್ಟೇ ಅಲ್ಲದೇ ಇವರು ತಮ್ಮ ಮನೆಯ ಸುತ್ತ ಔಷಧೀಯ ಸಸ್ಯಗಳನ್ನು ಸಹ ಬೆಳೆಯುತ್ತಿದ್ದು, ಜೇನು ಕೃಷಿಯಲ್ಲಿ ಸಾಧನೆ ಮಾಡುವ ಮೂಲಕ ಹಲವು ಪ್ರಶಸ್ತಿಗಳನ್ನು ಸಹ ತಮ್ಮದಾಗಿಸಿಕೊಂಡಿದ್ದಾರೆ.

ಕೃಷಿಕರಿಗೆ ಹಾಗೂ ವಿದ್ಯಾರ್ಥಿಗಳಿಗೆ ಜೇನು ಕೃಷಿ ಬಗ್ಗೆ ಉಚಿತ ವಸತಿ ಸೌಕರ್ಯ ನೀಡಿ ತರಬೇತಿ ಹಾಗೂ ಮಾಹಿತಿಯನ್ನು ನೀಡುತ್ತಾ ಬಂದಿದ್ದು, ಆಸಕ್ತರಿಗೆ ಮಾದರಿ ಎನಿಸಿದ್ದಾರೆ. ಪ್ರಧಾನಿ ಶ್ರೀಯುತ ನರೇಂದ್ರ ಮೋದಿಯವರು ನಡೆಸಿದ 91ನೇ ಆವೃತ್ತಿಯ ‘ಮನ್ ಕಿ ಬಾತ್’ ಕಾರ್ಯಕ್ರಮದಲ್ಲಿ ಮಧುಕೇಶ್ವರ ಹೆಗಡೆ ಅವರ ಕಾರ್ಯ ವೈಖರಿ ಹಾಗೂ ಜೇನು ಪ್ರೀತಿಯ ಬಗ್ಗೆ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಪುತ್ತೂರು ತಾಲೂಕು ಬೆಟ್ಟಂಪಾಡಿಯ ಶ್ರೀ. ಮನಮೋಹನ ಆರರ ಇವರು ಇಂದು ಜೇನುಕೃಷಿಯಲ್ಲಿ ಸೈ ಎನಿಸಿಕೊಂಡಿರುವ ಸ್ವಾವಲಂಬಿ ಕೃಷಿಕ. ಅಂದು ಒಂದು ಪೆಟ್ಟಿಗೆಯಿಂದ ಜೇನು ಸಾಕಣೆ ಆರಂಭಿಸಿದಾಗ ಎಂಟನೇ ಕ್ಲಾಸಿನ ವಿದ್ಯಾರ್ಥಿ. ಹೀಗೆ ಸಣ್ಣ ಪ್ರಮಾಣದಲ್ಲಿ ಆರಂಭವಾದ ಜೇನುಕೃಷಿ ಇಂದು ಪುತ್ತೂರಿನಿಂದ ಮೈಸೂರಿನವರೆಗೆ ಒಟ್ಟು 90 ಕಡೆಗಳಲ್ಲಿ ಎರಡು ಸಾವಿರಕ್ಕೂ ಹೆಚ್ಚು ಗೂಡುಗಳಿಂದ ಜೇನು ಉತ್ಪಾದಿಸಲಾಗುತ್ತಿದೆ.

ಎರಡು ಸಾವಿರಕ್ಕೂ ಹೆಚ್ಚು ಜೇನುಗೂಡುಗಳಿಂದ ವರ್ಷಕ್ಕೆ ಸುಮಾರು 16 ಸಾವಿರ ಕೆಜಿ ಅಷ್ಟು ತುಪ್ಪ ತಯಾರಿಸುತ್ತಾರೆ. ಅದೇ ರೀತಿ ವರ್ಷಕ್ಕೆ 2೦,೦೦೦ ಕೆಜಿ ತುಪ್ಪ ಹಾಗೂ, 400 ಕೆಜಿ ಮೇಣ ಮಾರಾಟ ಮನಮೋಹನರ ಸಾಧನೆ. ‘ಹನಿ ವರ್ಲ್ಡ್’ ಇವರ ಬ್ರಾಂಡ್, ಜೇನು ಕುಟುಂಬ ಮಾರಾಟ ಮಾಡುವ ಹಾಗೂ ಶುದ್ಧ ಜೇನು ಸಂಗ್ರಹಿಸುವ ಕರ್ನಾಟಕದ ಏಕೈಕ ಯುವ ಕೃಷಿಕ ಎಂಬ ಹೆಗ್ಗಳಿಕೆ ಕೂಡ ಹೊಂದಿದ್ದಾರೆ.

ಜೇನು ಕೃಷಿಯಲ್ಲೇ ಸುಮಾರು 20 ಜನರಿಗೆ ನೇರ ಉದ್ಯೋಗ ನೀಡುತ್ತಿರುವ ಇವರು ತಮ್ಮ ಆಗಾಧ ಅನುಭವವನ್ನು ಜೇನು ಸಾಕಾಣಿಕೆಗಾಗಿ ತಮ್ಮ ಬಳಿ ಬರುವವರಿಗೆಲ್ಲಾ ಧಾರೆ ಎರೆಯುತ್ತಿದ್ದಾರೆ. ಅಷ್ಟೇ ಅಲ್ಲದೇ ಇವರು ರಾಜ್ಯೋತ್ಸವ ಪ್ರಶಸ್ತಿ ವಿಜೇತರಾಗಿದ್ದು, ಗುಜರಾತ್ ರೈತರಿಗೆ ಜೇನು ಸಾಕಾಣಿಕೆಯ ಬಗ್ಗೆ ಹೆಚ್ಚಿನ ತರಬೇತಿ ನೀಡಿದ್ದಾರೆ. ಕರ್ನಾಟಕ ರಾಜ್ಯದ ಜೇನು ಉತ್ಪಾದನೆಯಲ್ಲಿ ಆಗಣ್ಯ ಸ್ಥಾನದಲ್ಲಿ ಇರುವ ಇವರು ರಾಜ್ಯದಾದ್ಯಂತ ಜೇನು ಕುಟುಂಬಗಳನ್ನ ಒದಗಿಸಿಕೊಟ್ಟು ಜೇನು ಕೃಷಿಕರಿಗೆ ಪ್ರೇರಣೆಯಾಗಿದ್ದಾರೆ.